Ginakonsiderar sang provincial government sang Negros Occidental ang nahanungod sa mga nagkalainlain nga suhestyon nga sarang ipatuman kaangay sang BacTrac system.
Suno kay Provincial Administrator Atty. Rayfrando Diaz, ginatun-an pa sang mga ini ang nahanungod sa BaC-Trac apang nagapamalabag ang mga kwestyon natuhoy sa pagbayolar sa privacy sang mga pumuluyo.
Madamo man ang mga ini sang gina-entertain nga mga teknolohiya kag software kag ginatun-an pa kun ano ang mas mahapos kag magamit sa rural settings.
Suno kay Diaz, ginatun-an ini bangod indi tanan ang may yara sang mobile phone kag indi tanan ang may ikasarang sa pagprint sang ID.
Ginpakigbahin naman ni Diaz ang maayo nga balita nga malapit nalang mahuman ang Command Center kun sa diin maangot ang tanan nga Emergency Operations Center (EOC) sang kada local government unit (LGU) sa probinsya.
Pinaagi sini mahapos nalang nga mashare ang mga resources sang mga LGU sa nagakinahanglan.
Suno diri, ginahulat nalang ang mga empleyado nga ibutang sa command center nga gintukod para sa benepisyo sang bilog nga probinsya.
