Ginpasalig sang bag-o nga gin-appoint nga General Manager sang Bacolod City Water District nga iwork-out sini sa PrimeWater nga ma-imprubar ang water supply kag water quality.
Sa interview sang Bombo Radyo Bacolod kay Engr. Michael Soliva, ginklaro sini nga ang alkalde sang ciudad amo ang naga-appoint sang mga mangin miyembro sang Board of Director sang Water District.
Samtang ang Board of Directors naman amo ang naga-appoint sang magapungko nga General Manager.
Ini kasunod sang pagtapos sang term ni former General Manager Mona Dia Jardin, kag ini ang wala na ginrenew bangod sa ginapahayag “lost of trust and confidence”.
Nakadepende suno diri sa Board of Directors kun ano ka lawig ang pagpungko sang General Manager sa pwesto.
Suno kay Soliva, siya ang nakapungko na sadto sang duha ka tuig bilang Acting General Manager sang BACIWA sumugod 2020, sa tion sang transition period sa pagsulod sa Joint Venture Agreement sa PrimeWater.
Pasalig sini nga sa liwat nga pagpungko, may mas dako na ini nga ikasarang sa pag-imprubar bangod nakita na niya ang mga kakulangan nga kinahanglan ma-address, partikular na ang paghatag sang tubig sa mga lugar nga makabig bottlenecks.
Luwas sa pagdeliver sang nagakaigo nga supply, tinguhaan man nila nga mahatag ang maayo nga kalidad ukon potable nga tubig.
Pasalig ni Soliva nga ang BACIWA ang yara sa gihapon sa ibabaw sang PrimeWater, kag kun may ara sang mga implementasyon ang pribado nga kompanya, ini ang nagakinahanglan pa sang approval sang Board of Directors antes mapatuman.
Panindigan sini nga indi makapatuman sang proyekto ang PrimeWater nga wala nila mahibaluan, kag indi man nila pagtugutan kun makita nga ang ipatuman nga proyekto ang indi para sa pag-imprubar sang serbisyo.
Si Soliva ang nagsugod sa BACIWA bilang casual employee sang 2011 tubtob nga nagsaka sa pwesto.
Pasalig sini nga sila ang may mga ginalay-out na nga plano, kag ini ang amat-amat naman nga ipatuman.
