Nagapati ang panibag-o nga Bacolod City Fire Marshall nga pinaagi sa eksperyensya mapasanyog sini ang programa sang Bureau of Fire Protection sa syudad.
Sa interview sang Bombo Radyo Bacolod Fire Chief Inspector Stephen Jardeleza, siya ang nagapungko bilang acting Provincial Fire Marshall sa Guimaras antes ginsaylo sa Bacolod City Fire Station.
Ginpasalig sini nga seguruhon niya ang mabaskog nga commitment sang mga BFP bilang ahensya, pinaagi sa pagpatuman sang mga programa kag aktibidad sa benepisyo sang mga pumuluyo.
Dugangan pa sini ang kapisan nga gin-umpisahan ni former Bacolod City Fire Mashall Chief Inspector Rodel Legazpi,kag iga-upgrade pa sini ang ila nga serbisyo sa mga Bacolodnon.
Maga-introduce man ini sang dugang nga innovation agud mas mapalapta pa ang kampanya sa fire safety and prevention.
Sa 24 anyos nga serbisyo, ginabatun naman ni Jardeleza ang challenge sa pagpamuno sa BFP-Bacolod.
Bilang anay Municipal Fire Station sa nagkalainlain nga banwa gikan sa Capiz, Aklan, Iloilo kasubong man bilang Regional Logistics kag Acting Regional Fire Marshall sa Guimaras, balon sini ang eksperyensya kag training sa paghatag sang dekalidad nga serbisyo para sa mga pumuluyo.
Nagalaom si Jardeleza nga siya ang gilayon nga makapatigayon sang appointment kay Bacolod City Mayor Alfredo “Albee” Benitez kag sa mga local government unit (LGU).
Ipadayun man sini ang mga standard program sang BFP kaangay sang kampanya sa Oplan Ligtas Pamayanan nga isa ka year-round program.
Samtang kasunod naman sa Community Fire Protection Planning, sila ang magapatigayon sang Hazzard mapping kag house to house surveys kaupod sa mga opisyales sang Barangay.
Pinaagi sini, ila matumod kun ano ka dasig mahimo ang pagresponder sa isa ka lugar kun may magluntad nga sunog.
Magapatigayon man si Jardeleza sang skills inventory para sa mga BFP personnel, agud nga matumod ang ila nga kapasidad kag abilidad kag maseguro nga disiplinado kag preparado ang mga ini inkaso kinahanglanon ang pagresponder sa sunog.
