Ginpahayag sang port manager sang bag-o nga Banago Port sa ciudad sang Bacolod nga isa sa advantage sa paggamit sang pantalan nga gina-manage sang Philippine Ports Authority amo nga mas barato ang ginabayran sang mga customer.
Sa interview sang Bombo Radyo Bacolod kay Rodel Lagmay, mas barato ang ginabaydan sa pagsulod sa Banago port indi kaangay sa iban nga pantalan nga gina-manage sang private sector.
Suno kay Lagmay, ang customer ang magabayad lamang kun magsakay na ini sa barko samtang may terminal-fee man sa pagpasakay sang salakyan sa barko bangod may-ara sang gina-impose nga taripa ang PPA.
Suno diri ang mga motorsiklo ukon Type 1 vehicles ang may yara sang bayaran nga P65; Type 2 ukon mga 4 wheels vehicles nga may bayaran nga P129, samtang ang mga dalagko nga mga trucks nga tubtob 10 wheelers nga may bayaran nga P516.
Kun ang mga salakyan ang magadul-ong lamang sa pasahero, sila ang may bayaran nga P12 para sa toll gate.
Dugang pa sini nga sa pag-abot sa Dumanggas port ang pasahero ang wala na sang iban nga bayaran kag vice versa indi kaangay sa pribado nga pantalan nga sa tagsa ka port terminal nagabayad ang pasahero.
Sa karun may duha lamang ka kumpanya sang barko ang nagadungka sa Banago port kag nagalaom si Lagmay nga madugangan pa ini sa tion nga makay-o ang iban nga ramps.
Ginalantaw man nga mangin dako nga bulig ang pantalan sa ciudad makaligad ang tatlo ka tuig bangud ginalantaw nga may yara na sang magadungka nga mga cruise ships nga nagabiyahe kag nagalibot sa bilog nga kalibutan.
Sa Banago port man magadungka ang mga barko nga may karga nga imported nga bugas, kalamay kag iban pa nga pagadal-on sa ciudad sang Bacolod.
Bangud sa bag-o nga Banago port mas manubo na ang bayran sang mga negosyante sa gin-import nga bugas kag kalamay bangud indi na maga-agi sa iban pa nga pantalan antes makalab-ot sa ciudad sang Bacolod.
