Ginpasalig sang bag-o nga commander sang 3rd Infantry Division sang Philippine Army nga padayunon sini ang ginsuguran sang ginbuslan niya nga si Lt. General Benedict Arevalo.
Sa interview sang Bombo Radyo kay Brigadier General Marion Sison, nagbiya ini bilang commander sang 301st IB sang Pebrero 9 kag ginbuslan ni Col. Michael Samson, samtang nagpungko ini bilang assistant division commander sang 3rd ID sang Pebrero 10.
Makaligad ang duha ka semana, nag-assume na ini bilang division commander sang 3rd ID, bulos kay Lt. Gen. Benedict Arevalo.
Suno kay Sison, blessed ini sa posisyon bangud isa ini sa mga ginahandum sang isa ka Army official samtang humbled naman ini nga mamuno sa 3rd ID.
Suno diri, ginahatag niya ang dedikasyon kag matuod nga pagtrabaho agud nga maaccomplish ang obligasyon.
Si Sison ang tumandok sang Batangas.
Ginpasalig sini nga padayunon ang mga plano kag nasuguran sang previous division commander nga si Lt. Gen. Benedict Arevalo bangud nakafocus ang mga ini sa pagpauntat sang local armed conflict sa rehiyon.
Suno diri, padayunon nila ang pagpatigayon sang focus military operations kag pasanyugon pa ang stakeholders engagement kag cooperation sa local government units agud nga maenhance ang Task Force to End Local Communist Armed Conflict.
Naghingyo naman ini sang suporta sang mga miyembro sang 3rd ID agud nga malab-ot ang ila nga goal nga peace kag prosperity.
