Ginpagwa sang Philippine National Police (PNP) ang ila panibag-o nga approach sa ila nga anti-illegal drugs strategy, nga sa karun nagatarget na sa mga sources kag supply chains sang illegal nga droga imbes nga sa mga street-level pushers kag users.
Sa statement ni PNP chief Police General Rommel Francisco Marbil, ang focus nila sa karun amo ang mga high-value drug personalities kag ang paghulag sang illegal nga droga sa sulod sang pungsod.
Paathag ni Marbil nga ang matuod nga targets amo ang mga nagapamuno sang pagbaligya ukon ang nagakita gikan sa illegal nga negosyo kag indi ang mga street-level pushers kag users, nga sa masami biktima man sang sirkumstansya.
Pahayag sang PNP, ang recalibrated approach ang gindesinyo agud mangin mas epektibo kag malikawan ang maduguon nga kampanya, pinaagi sa paghatag sang dugang nga balor sa tawhanon nga kanamatarong kag pag-address sa ugat sang problema sa illegal nga droga.
Ini ang lakipan sang intensified intelligence operations kag mas ginpabaskog nga community engagement agud matumod kag madismantle ang mga drug trafficking networks.
Dugang pa sang Chief PNP nga ang ila nga tinutuyo amo ang ma-address ang drug problems nga wala sang magadanak nga dugo.
Pinaagi sa pagfocus sa matuod-tuod nga rasun kag pagprotekta sa mga biktima, mangin mas hilway ang komunidad.
Dugang pa ni Marbil nga sang nakaligad, ang estratehiya ang nakaconcentrate lamang sa pagtarget sang ulo, apang panindugan sini nga dapat man targeton ang lawas, ukon ang supply chain nga amo ang nagapalapta sang droga.
