Ginbuksan na sang Lunes, Setyembre 14, ang bag-o nga merkado nga ginpatindog sa banwa sang Cauayan.
Sa interview sang Bombo Radyo kay Mayor John Rey Tabujara, P100 million ang balor sang ginpatukod nga merkado kun sa diin ang P30 million ang nagikan sa kwarta sang banwa samtang ang P70 million ang ginloan sa Development Bank of the Philippines (DBP).
Suno kay Tabujara, matapos ang pila ka tuig nga plano, natuman gid man ang ila handum nga bag-o nga public market nga may kalaparon nga malapit duha ka hektarya bangud gamay kag guba na ang daan nga merkado.
Suno sa iya, bulan sang Hunyo ang ila target nga mahuman ini apang bangud ginpaidalum ang probinsya sa enhanced community quarantine (ECQ) sa sulod sang 60 ka adlaw halin sang Marso, nadelay man ang pag-ubra diri kag may mga materyales nga wala gilayon nga nadeliver.
Suno sa alkalde, sa bag-o nga public market, separado na ang mga baligyaan sang dry goods, mga utan, karnehan kag mga karinderya agud indi maghagko kag indi magsamo ang baligya.
Gindugang man sini nga lapit na lang mafully booked ang mga pwesto sa merkado bangud sa kadamo sang mga aplikante apang iya ginhatagan prayoridad ang mga una na nga nagabaligya sa daan nga merkado.
Nagapasalamat ini sa mga miyembro sang Sangguniang Bayan sa pagsuporta sa nasambit nga programa subong may kay Governor Eugenio Jose “Bong” Lacson kag Congressman Genaro Alvarez Jr. sa pagtambong sa inagurasyon sang Lunes.
Nagpanawagan man si Tabujara sa mga residente nga apisar magalain ang balayran sang renta sa karun nga building sang sa daan nga merkado, buligan na lang agud gilayon nga makabawi ang banwa sa loan sini sa DBP.
