Ginkumpirmar sang Optometrist nga nag-post sa social media angot sa indi maayo nga hiligdaan sa Hinoba-an District Hospital nga may nag-abot na nga napulo ka hiligdaan para sa mga pasyente.
Sa interview sang Bombo Radyo Bacolod kay Dr. Noeh O. Fernandez Jr., Dean sang College of Optometry sa Southwestern University – Cebu, nalipay ini bangud may yara sang madasig nga solusyon ang provincial government sang Negros Occidental bangud sa post sini sa social media.
Suno kay Fernandez, nagalaom siya nga maabot ang tion nga ang mga hospital sa Negros Occidental ang makahatag sang nagakaigo nga serbisyo sa pasyente kaangay sang MRI, CT scan kag iban pa nga indi na kinahanglan mag-travel padulong sa iban nga hospital bangud ang natabo sa tiyo niya nga kinahanglan pa nga ibiyahe padulong sa ospital sa Negros Oriental kag Kabankalan City agud nga makuha ang kinahanglan nga serbisyo.
Ginpahayag man sini nga dapat ang mga district hospitals ang mahatagan sang nagakaigo nga suporta sang Department of Health kag mapatuman ang mga programa nga base sa nakasaad sa Universal Health Care Act.
