Wala sang bisan isa ka papel nga lista sang budget nga nabaton ang bag-o nga punong barangay sang Barangay Handumanan matapos ang pagturn-over sang Barangay Hall.
Sa interview sang Bombo Radyo kay Punong Barangay Maria Febe Legaspi, wala ini sang may nabaton nga papel ukon dokyumento sa budget sang barangay amo nga wala ini nakapasulod sang empleyado bangod nga wala ini sang may mahatag nga sweldo.
Sa karun volunteers lamang ang nagatrabaho sa barangay sa pag-address sa mga concerns sang pumuluyo.
Suno diri, magapadulong ini sa budget office, accounting office kag Department of the Interior and Local Government (DILG) agud mangayo sang advice kun ano maayo nga himuon.
Pahayag ni Legaspi, kun tani nagakooperar lang tani ang previous nga mga opisyal, wala gid tani sang problema.
Samtang, dugang pa gid nga may yara sang duha ka bill sang kuryente ang wala nabayaran.
Sa bulan sang Oktubre kag Nobyembre ang bill sang barangay nagdangat sa kapin P74,000 kag P68,000.
Pamangkot ni Legaspi kun diin sini kuhaon ang inugbayad sa kuryente kun wala ini sang lista sang budget sang barangay nga sa karun kaangay nga negatibo na ang unod sang Maintenance and Other Operating. Expenses (MOOE) sang barangay.
Sa karun, may yara pa sang mga computer nga nabilin sa barangay apang isa na lang ang nagafunction diri kag may yara pa man sang dutay nga bangko kag mga kagamitan nga nabilin.
Indi naman sini macontact ang anay treasurer sang barangay kasubong man nga indi sini mareach out si former Punong Barangay Ricardo Danoy.
Samtang, subong nga adlaw patigayunon ang mass oathtaking sang mga elected Barangay kag Sangguniang Kabataan officials alas 6:00 sang gab-i.
Alas 7:30 naman subong nga aga tubtob alas 5:00 sang hapon, patigayunon ang seminar sa mga SK chairman kag SK kagawad.
