Nakatambong na sa una nga kahigayunan ang bag-o nga Sangguniang Kabataan (SK) Federation President sa regular session sang Sangguniang Panlungsod sang Bacolod.
Sa interview sang Bombo Radyo Bacolod kay Danna Marie Cuaycong Barzo, SK Chairman sa Barangay Mandalagan, nga un-oppose sa nangin eleksyon para sa panibag-o nga SK Federation President, gin-athag sini nga siya ang nakulbaan sa una nga pagtambong sa session apang madamo man ini sang natun-an.
Si Barzo ang isa ka nursing graduate kag hinablos sang secretary ni Bacolod City Mayor Alfredo “Albee” Benitez nga si May Cuaycong nga amo sa karun ang nagadumala sa Bacolod Comprehensive Health Program (BacCHP).
Sa pagtambong sa session, na-obserbaran man ni Barzo kun paano ang paghimo sang mga ordinansa.
Nahibaluan nga bilang SK Federation President, automatic naman nga siya ang Chairperson sa Committee on Sports and Youths kag makabahin na sa regular session upod sa mga konsehal sa ciudad sa pagpanguna ni Vice Mayor El Cid Familiaran.
Sa karun si Barzo ang wala pa nakatransfer sa panibag-o nga opisina bangod padayun pa ang pagpanghimos sang anay SK Federation President nga si Ayesha Joy Villaflor nga sa karun Barangay Kagawad naman sa Barangay 6.
Suno kay Barzo, bilang SK Federation President, plano sini nga unahon ang pagpasar sang ordinansa nga nakafocus sa edukasyon sang mga pamatan-on.
Ginapasalamatan naman sini nga siya ang ginagiyahan sang pila ka mga konsehal.
Bilang miyembro sang konseho, si Barzo ang magabatun man sang kaangay nga sweldo sa mga konsehal sa ciudad sang Bacolod.
Panawagan sini sa mga Sangguniang Kabataan sa 61 ka mga Barangay sa Bacolod City nga sila ang magbuligay bangod indi niya masarangan ang responsibilidad nga naga-isahanon lamang.
Samtang nagapabilin gihapon nga si Councilor Lady Glez Gonzales Pallen ang presidente sa Liga ng mga Barangay sa ciudad sang Bacolod.
