Nagtake oath na ang bag-o nga mga set of officers sang Progressive Alliance of Capitol Employees (PACE) sa atubang ni Negros Occidental Governor Eugenio Jose “Bong” Lacson kahapon.
Wala naman nagtambong sa nasambit nga oathtaking ceremony si Security Division Head Renelo Lastierre, nga amo ang anay PACE President, apisar nga siya ang ginpabilin nga member sang Board of Directors.
Sa interview sang Bombo Radyo Bacolod kay Engr. Ruben Diamante, ang bag-o nga PACE President, pila ka mga officers ang wala nakatambong sa oath-taking sa Office of the Governor kahapon bangod sa nagluntad nga mga pagbaha nga nag-apekto sa ila nga mga puluy-an.
Aminado si Diamante nga wala na sila nakahinun-anon ni Lastierre humalin sang sila ang nagpatigayon sang election, apang pasalig sini nga ginpost nila ang schedule sang oathtaking sa ila nga group chat.
Dugang pa sini nga naseen man sang anay PACE President ang oath taking notice, apang ini ang wala nagkumpirmar ukon nagsabat.
Ginalantaw sini nga masakit pa gihapon kay Lastierre ang natabo nga pagpahalin sa iya bilang Presidente, apang panindugan ni Diamante nga ini ang ginpili sang Board kag mga miyembro sang PACE.
Sa pihak nga bahin, nakita naman sini nga ginakalipay ni Governor Lacson ang ila nga pagpanumpa kag ginpasalig lamang sang gobernador nga indi mabutang sa alang-alang ang benepisyo sang mga empelyado.
Ginpromisa naman ni Diamante nga sa pagpanumpa sini, iya man igaduso ang Abanse Negrense nga programa sang Probinsya kag seguruhon ang kaayuhan sang mga empleyado sa Negros Occidental Government.
