Aminado ang newly appointed undersecretary sang Department of Social Welfare and Development (DSWD) nga nakibot man ini sang gintawgan agud pahibaluon nga ang pangalan sini ang iganominate agud mangin undersecretary.
Sa interview sang Bombo Radyo Bacolod kay Undersecretary Alan Tanjusay, gintawgan siya para sa nomination apat ka semana ang nakaligad.
Ginpapasa man siya sang iya nga personal data sheet kag sang iya nga resume kay Executive Secretary Vic Rodriguez kag ginforward man kag sa opisina ni President Ferdinand “Bongbong” Marcos Jr.
Sang Biyernes, nabaton na sang Department of Social Welfare and Development (DSWD) ang appointment letter ni Tanjusay nagikan sa opisina sang presidente bilang undersecretary for inclusive and sustainable peace.
Ginkalipay man ni Tanjusay ang appointment apang ginpamangkot man sini ang iya kaugalingon kun siya ang qualified.
Aminado man ini nga dako nga pagpanghangkat sa iya ang appointment kag ginalantaw man sini nga mabudlay kag dako nga responsibilidad.
Suno kay Tanjusay, apisar nga challenging ang appointment sini, nakahibalo siya nga masarangan niya ini bangud siya ang nagdako man sa pamilya nga pigado kag nakahibalo man ini kun paano magdeal sa mga problema.
Gin-appoint ni President Ferdinand “Bongbong” Marcos Jr. ang spokesperson sang Associated Labor Unions–Trade Union Congress of the Philippines bilang undersecretary for inclusive kag sustainable peace agud maghatag sang nagakaigo nga bulig para sa mga rebel returnees kasubong man sa pamilya sang mga ini.
