Nasapwan ang buhi nga lapsag nga lalaki sa Bagong Dalan, Brgy Puyas sa banwa sang Murcia alas-11:50 kagab-i, Abril 15.
Sa interview sang Bombo Radyo Bacolod kay Carl Arpon, residente sa Prk Violeta, Brgy Taculing, Bacolod City, gikan sila sa banwa sang Salvador Benedicto kaupod sa duha sini ka kaingod balay kag naghapit lamang kuntani sa Murcia sa pagpangita sang damag antes magapauli.
Apang samtang nagapangita, nakabati sila sang hibi, nga sa umpisa ginpinsar pa nila nga kuring.
Sang gintutukan sang iya abyan sang flashlight didto na nila nga bag-ong bun-ag nga lapsag ang nagahibi.
Suno kay Arpon, nagakulob ang lapsag, yara pa ang umbilical cord kag may mga dugo-dugo pa sa lawas nga pamatuod nga ini ang bag-o lamang natawo.
Ini ang yara sa bahin nga ginahabuyan sang basura kapin isa ka metro lamang ang kalayuon sa highway.
Wala nila gintandog ang lapsag sa kahangawa nga mapasibangdan, sa baylo sila ang dali-dali nga nagdangop sa Murcia Municipal Police Station sakay sa ila tricycle.
Ginhingagaw man nila balikan ang lapsag, samtang ang kapulisan ang nag-upod man sang personnel gikan sa Municipal Health Office.
Ginapasalamat man sang kapulisan nga nakita nila nga buhi ang lapsag.
Suno kay Arpon, antes makita ang lapsag, may nakita sila nga babayi kag lalaki nga angkasanay sa sniper nga motorsiklo, apang wala na nila namurutan bangod sa madulom ang lugar.
Indi man nila segurado kun ang nakita nga nakamotorsiklo amo ang mga ginikanan sang lapsag.
