Isa ka bag-ong bun-ag nga lapsag ang nasapwan nga wala na sang kabuhi kag naga-utaw utaw sa irigasyon sa Purok Mahogany, Barangay Napoles, Bago City.
Sa interview sang Bombo Radyo Bacolod kay Ana Luna Dalisay, 33 anyos, iloy, iya 10 ayos kag 11 anyos nga mga hinablos nga lalaki ang nakakakita sa nasambitan nga lapsag.
Pahayag sini nga nagalagaw ang duha kapin alas-10:00 tubtob alas-11:00 sang aga kahapon sang may nakita nga naga-utaw utaw sa irigasyon.
Gintindakan pa sang mga ini, apang didto na nila natalupangdan nga ini ang isa ka lapsag.
Gilayon man nga ginpahibalo sang mga kabataan sa mga tawo sa palibot ang natuhoy sa bangkay.
Suno kay Dalisay, sa paglantaw sini kaangay nga naputos pa sa placenta ang lapsag gani nagapati ini nga bag-o gid lamang ini gintawo.
Dugang pa niya nga wala paman na-agnas ang lapsag apang nagagit-om na ang iya nga mga butkon.
Ginpatakas naman sang tiyo sang mga kabataan ang biktima kag ginbutang sa isa ka labador, samtang gilayon man ini nga ginpadulungan sang City Health workers kag kapulisan.
Sa pagtsekyar sang mga healthworkers, babayi ang nasambitan nga lapsag.
Ang bangkay ang gindala naman sa punerarya sa syudad sang Bago kag ginpahayag nga igalubong na lamang.
Masakit naman sa balatyagon para sa iloy nga makita ang kahimtangan sang lapsag.
Suno pa diri, madamo sang mga ginikanan nga luyag magkabata apang wala ginabugayan, apang may ara naman sang mga ginapanghal-id lamang ang ila kabataan.
Wala naman ang mga ini sang nahibaluan nga nagabusong nga mahimo iloy sang lapsag sa ila nga Barangay.
