Ginakilala bilang ‘Baby Moises’ ang newborn ukon bag-ong bun-ag nga lapsag nga lalaki nga nasapwan malapit sa suba sa Barangay Tabunan, Bago City, Negros Occidental.
Sa interview sang Bombo Radyo kay Bago City Mayor Mayette Javellana, sang Hulyo 28 may isa ka residente nga naglabay sa suba nga nakabati nga may nagahibi nga bata.
Suno diri, ginpangita sini ang bata kag sang nakit-an dali-dali ini nga nagkuha sang tuwalya.
Yara pa nakatakod ang umbilical cord sang bata kag may mga subay na nga nakit-an sa bata.
Gilayon ini nga ginreport sa brgy hall kag ginkoordinar sa City Social Welfare and Development Office.
Gindala naman sa city health office ang bata para sa medical intervention kag ginpablotter na ang insidente.
Sa karun ginakilala nga si ‘Baby Moises’ ang bata kag wala pa sang klaro nga impormasyon sa identity sang ginikanan sini.
Pahayag ni Javellana, iya ginalauman nga mangin maayo lang kun ano man ang mangin bwas damlag sang bata.
