Gintaban sang tatlo ka wala pa makilal-an nga mga persona ang puti nga Honda Click nga motorsiklo sang mag-asawa sa Dalan Lacson, Barangay Mandalagan, Bacolod City kaina alas 4:30 sang kaagahon.
Sa interview sang Bombo Radyo kay Jessabel Sinogbuhan, kaupod sini ang iya bana nga nagbiyahe nagikan sa Sagay City agud magkuha kuntani sang lapida sa Dalan Lacson.
Samtang nagahulat ang mga ini nga magbukas ang establishmento, nanaog sila sa motorsiklo kag nagpungko sa higad.
Nabilin naman ang yabi nga nakaangot sa motorsiklo.
Suno kay Sinogbuhan, may naglabay nga tatlo ka mga lalaki nagikan sa sur nga bahin kag hinali lamang nga ginsakyan ang motorsiklo sang bana sini kag gintayaan sila sang armas-luthang.
Nagtuyo pa nga magbato ang iya bana apang nagpalupok ang isa sa mga suspetsado kag nagmaneho padulong sa norte.
Nagahilibion si Sinogbuhan bangud brand new pa ang nasambit nga motorsiklo kag kahapon gid lamang nila nakuha.
Nag-upod naman ang mag-asawa sa patrol sang Bacolod Police Station 3 agud malagas ang mga suspetsado kag mabawi ang nasambit nga motorsiklo.
