Gin-lockdown ang Bago City Hospital humalin sang Miyerkules sang gab-i matapos nga nagpositibo sa COVID-19 ang isa ka doktor.
Sa interview sang Bombo Radyo Bacolod kay Bago City Mayor Nicolas Yulo, ginpahayag sini nga naka-lockdown ang amo nga ospital sa sulod sang tatlo ka adlaw.
Suno sa alkalde, ang emergency room lang ang bukas para sa emergency cases kag maga-resume sila sa pagbaton sang new admission sa Lunes.
Gilayon naman nga nagpatigayon sang contact tracing kun sa diin gin-isolate kag gin-swab na ang 20 ka mga personnel sang ospital nga naka-close contact sa nagpositibo nga doktor.
Dugang pa ni Yulo nga ila karon gina-amat-amat discharge ang mga pasyente nga pwede na makagwa agud nga ma-disinfect ang mga bakante nga kwarto.
Magalawig ang disinfection sang tatlo ka adlaw.
Samtang, dugang nga tatlo ka mga personnel sang Teresita Lopez Jalandoni Provincial Hospital sa ciudad sang Silay ang nagpositibo man sa COVID-19.
Ini ang ginalakipan sang isa ka admitting clerk, isa ka nurse supervisor kag isa ka medical technologist.
Santo naman sa pinakaulihi nga report, nagnegatibo naman sa balatian ang tatlo ka mga doktor sa TLJPH nga una na nagpositibo.
