Desidido ang pamilya sang napatay nga pasyente sa Bago City Hospital nga magpasaka sang kaso batok sa ospotal bangod sa lapses sini nga nagresulta sa pagkapatay sang biktima.
Madumduman nga sang Pebrero 18, may isa ka lapsag nga napatay sa ospital nga ginreklamo sang amay bangod sa mga lapses man.
Sa karun, liwat nga ginreklamo ang Bago City Hospital bangod sa kamatayon sang pasyente nga si Cyrene Tolosa Gersala, kasado, may tatlo ka bata kag residente sang Brgy Busay sa nasambit nga ciudad.
Sa interview sang Bombo Radyo kay Kerr Tipawan Tolosa, utod sang biktima, Pebrero 22 nagabyahe si Gersala sakay sa motorsiklo angkas ang ila manghod apang napiyongan ini kag nagbunggo sa puno ang ila motosiklo nga nadagdag sa gutter.
Wala sang pilas ang manghod nila nga gaangkas apang si Gersala ang nag-agom sang injury sa paa.
May nag-abot nga ambulansya kag siya ang ginhambalan nga naman-ol lang ang tiil sini apang naghambal ang doktor nga dapat ini operahan kag mahimo nga mapadayon ang operasyon sa Pebrero 28, apang Pebrero 26 sang nagtaliwan ang biktima.
Suno kay Tolosa, maayo man ang kondisyon sang iya magulang kag sang Pebrero 26 ginhilanat ini kag ginhatagan sang duha ka paracetamol sa isa lang ka inom.
Sang hapon, naglisensya ini sa iya magulang nga manaog para magbakal sang ila pamahaw apang pagbalik sini nagreklamo na na si Gersala nga indi nabudlayan magginhawa.
Gilayon nga nagtawag sang nurse si Tolosa kag gindal-an sang oxygen si Gersala.
Bangod kulang ang nurse, mismo si Tolosa ang nag-assist na lang para sa iya magulang.
Sang nagkritikal na ang kondisyon ni Gersala, amo lang pag-abot sang doktor nga wala man suno kay Tolosa naggiyo kag nagamando lang sa mga nurse.
Ginhambalan sini ang doktor nga kun mahimo madala na lang sa emergency room ang pasyente apang siya ang ginsabat sang doktor nga ginahatagan man sang oxygen kag ginabuligan ang iya magulang.
Sang nadulaan sang pulso si Gersala amo pa lang sang ginpaperma si Tolosa sang waiver nga tubohan na ang pasyente kag amo lang sa nakita sini nga naggiyo na ang doktor para magtandog sa iya magulang.
Suno kay Tolosa, bisan wala na sang kabuhi ang iya magulang, ginpadayon ang pagrevive sa iya tubtob nga naghabok na ang ulo kag tiyan sini sang hangin.
Pahayag sini, nakita sa death certificate sini nga fat embolism ang resulta sang kamatayon kag ini ang wala man napa-intindi sa ila.
