Ginpahayag sang alkalde sa Bago City nga bugal sang bug-os nga pungsod ang pagkampyon sang Bago City Junior Softball Team sa 2023 Junior League Softball World Series sa Washington, USA.
Kahapon nagpatigayon sang Heroes Welcome ang Bago City Government para sa mga atleta, kag kabug-usan nga pumuluyo sang syudad ang nagahanduraw sa accomplishments sang mga kabataan.
Sa interview sang Bombo Radyo Bacolod kay Bago City Mayor Nicholas “Nico” Yulo, bugal sang syudad sang Bago ang mga kabataan, kag bugal man sang bilog nga Pilipinas.
Paathag ni Yulo nga kapin 50 ka tuig na sang mag-umpisa ang tradisyon sang mga alkalde sa syudad sa pagbulig sa mga atleta, kag ini ang gin-adoptar man niya sa karun nga administrasyon.
Ang vision sadto paman sa pagsuporta sa mga kabataan nga magsulod sa sports agud matudlo sa mga ini ang disiplina nga mangin mapinuslanon tubtob sa ila nga pagdako.
Sa personal nga pagtan-aw ni Yulo sa nangin hampang sang mga kabataan sa Washington, nakumpirmar sini nga mas mabatyagan ang nationalism sa tion nga ang mga atleta ang nagahampang na batok sa iban nga mga pungsod.
Aminado ang alkalde nga indi tuman ka dako ang abanse sang mga abilidad kag talento sang mga atleta sang syudad sa mga atleta sa luwas sang pungsod, magluwas sa exceptional performance ni Erica Arnaez, ang pitcher nga nakabuhat sang 85 strike outs sa pito ka hampang.
Nakita man ni Yulo ang team work sang mga kabataan, kag mapasalig sini nga ang abilidad sang mga estudyante ang bunga na sang ila nga dedikasyon kun sa diin sila ang nagatraining sa pagmata palang kag matapos ang klase.
Bangod sini makabig nga kumpleto na ang team sa maayo nga team work, maayo nga depensa, maayo nga hitters kag exceptional nga pitcher.
Samtang sa interview kay Negros Occidental Government Eugenio Jose “Bong” Lacson, ginpahayag sini nga ang pagchampion sang Bago City Junior Softball Team ang nagapakita lamang nga sarang sang mga Pilipino nga magcompete sa International stage.
Sa courtesy call sang mga kabataan sa gobernador kahapon, ginpangabay sini nga magfocus naman sa pag-eskwela nga mga kabataan bangod maga-umpisa na ang klase, apang nauna naman nga nagpahayag ang coach sang mga bata nga sila ang magabalik sa training sa masunod nga duha ka semana.
Ini bangod ila pa nga tinguhaan nga madepensahan ang ila nga titulo.
Magluwas sa Bago City, ang Negros Occidental Junior Softball Team ang nagpartisipar man sa torneyo apang wala ginpalad nga makadaog.
Pasalig sang gobernador nga ang Provincial Government ang padayun nga magasuporta sa Junior kag Senior Softball League.
