Ginpasalig sang alkalde sang Bago City, Negros Occidental nga nakapreparar na sila sa patigayunon nga duha ka adlaw nga “no movement” bangud sa mass testing sa syudad sa Agusto 30 tubtub 31.
Sa interview sang Bombo Radyo Bacolod kay Mayor Nicholas Yulo, ginpahayag sini nga kabahin sang ila preparasyon ang pagbutang sang border control point agud malimitahan ang paghulag sang mga pumuluyo.
Aminado man ini nga indi lockdown ang matabo bangud wala nakakuha sang permit sa national Inter-Agency task force (IATF) nga maglockdown.
Ginpangabay na lamang sini ang mga residente nga magkooperar sa patigayunon nga “no movement” para sa mass testing bangud para man ini sa kaayuhan sang tanan.
Dako man ang paglaom sini nga magakooperar ang mga Bagonhon sa patigayunon nga programa.
Suno kay Yulo, may yara sang derecho ang mga driver sang pampubliko nga salakyan nga magbiyahe ukon indi apang nagapanawagan lang ini sa gihapon nga magsunod sa minimum health protocols.
Suno pa diri, mangin instrikto man ang syudad sa pagpatigayon sang mass testing sa anom ka mga testing sites.
Gin-amyendahan man sini ang Executive Order nga ginpagwa bangud kun basahon, daw kaangay nga lockdown ang matabo.
Ginpahayag man ni Yulo nga may yara sang ginapalibot nga rekorida sa syudad agud magremind sa mga pumuluyo kag mag-engganyo sa ila nga magsunod sa mga programa agud mabuligan tapna ang COVID-19.
Suno kay Yulo, may yara sang kapin 900 ka mga residente nga magapaidalom sa swab testing.
Ginpahayag man ni Yulo nga gintumod sang syudad ang mga mapaidalom sa swab testing paagi sa barangay kag ginapasa man sini ang CIF form sa provincial government nga ginabutangan sang ngalan sang iswab test.
Nagpanawagan man ini sa mga pumuluyo sang syudad sang Bago nga magsunod sa “no movement” samtang ginapatigayon sang swab testing.
Samtang nakahanda na ang banwa sang Murcia diri sa Negros Occidental sa pagpatigayon sang COVID mass testing sa palaabuton nga Domingo kag Lunes.
Sa interview sang Bombo Radyo Bacolod kay Mayor Gerardo Rojas, ginpasalig sini nga well-prepared na ang banwa sa mass testing.
Suno kay Rojas, maayo man ang response sang mga pumuluyo sa patigayunon nga programa nga ginapangunahan sang provincial government.
Gina-engganyo man ni Rojas ang mga pumuluyo sang Murcia nagikan sa 23 tanan ka mga barangay nga magpalista na kun sila ang may ginabatyag nga sintomas sang COVID 19 agud mapaidalom sa swab test.
Mapagwa man ini sang Executive Order agud masiguro nga ang makagwa lang ang mga may importante ukon essential needs.
Nagpangayo man ini sang kooperasyon sang tanan kag nagahanumdom sa mga residente nga magsuksok sang face mask, face shield kag magsunod sa mga pagsulundan nga ginapatuman sang gobyerno bangud para ini sa kaayuhan sang tanan.
