Ang syudad sang Bago ang naghost sa ginpatigayon nga 2022 Mt. Kanlaon Natural Park Festival ukon ang “Halad kay Kang-Laon”.
Suno kay Mae Ann Furtos, tourism officer sang Bago City, 2019 ang ulihi nga nagpatigayon sang tuigan nga festival matapos makanselar sa duha ka tuig ang event bangod sa COVID-19 pandemic.
Ang theme sang programa subong nga tuig ang “Pagbangon sang kumunidad, nasandig sa pag-amlig sang dunang manggad” nga gindihon sang tanan nga mga environment kag tourism officers Negros Occidental.
Ang aktibidad ang una nga ginpatigayon sang 2017 kag ginhost sang syudad sang La Carlota.
Paathag ni Furtos nga dako ang papel sang Mt. Kanlaon Natural Park sa syudad sang Bago bangud ang manggaran nga duta sa syudad ang tuga sang agricultural water nga naghalin sa water shed sang MKNP.
Dugang pa sini nga santo sa ila mga ginpatigayon nga pagsinapol, nakasugtan nga bangod nga indi lang 15 ka mga barangay nga yara sa sulod sang MKNP ang nakaangkon sang benepisyo sini, ginpakamaayo nga ma-involve ang tanan nga local government units (LGUs) sa probinsya.
Sa tatlo ka adlaw nga event, nangin core program ang pagpatigayon sang tree planting activity kun sa diin sila ang nagtanom sang 300 ka seedlings sang endemic trees.
Suno kay Furtos, may mga extra curricular activities nga ginapatigayon sa sulod sang MKNP apang indi para sa pagrestore sang manggaranon nga biodiversity sa kabukiran.
Samtang ang diwata kag suta pageant naman ang kabahin sang educational part sang event nga nagatuyo nga itudlo kag ipakita sa mga pamatan-on ang advocacy sa protection kag conservation sang MKNP.
Magluwas diri may iban pa nga mga aktibidad nga kabahin sa Halad kay Kang-Laon kaangay sang canvas kag body paintings.
May agriculture booth kag trade fair man nga ginpatigayon kun sa diin ginapahamtang sang kada LGU ang ila tagsa ka mga ginapabugal nga local products.
Paathag ni Furtos nga bangod ang Bago City ang ginakabig nga Rice Granary sa Negros Occidental, madamo man sang mga ginapabugal nga produkto ang human sa bugas.
Suno diri, ginalantaw naman sang mga ini ang posibilidad nga ang Victorias City ang magahost sang Mt. Kanlaon Natural Park Festival sa 2023.
Dako man ang pagpasalamat ni Furtos sa kooperasyon kag suporta sang mga LGUs sa Mt. Kanlaon Natural Park gani madinalag-on nga napatigayon ang programa.
