Malipayon ang mga Bagonhon boxers nga nagdaog sa nakaligad nga 31st Southeast Asian Games sa Hanoi, Vietnam matapos nga ginsugata ang mga ini sang heroes welcome sang Bago City Government.
Si Rogen Ladon nga nakakuha sang bulawan nga medalya sa Men’s flyweight division ang nakabaton sang P50 mil bilang cash incentive samtang si James Palicte, bronze medalist sa Men’s lightweight division ang nakabaton sang P30 mil nga cash incentive halin sa syudad.
Ang recognition ceremony ang ginhiwat sa Bantayan Park sa syudad sang Bago ang gintambungan ni Mayor Nicholas Yulo kaupod ang mga opisyal sang syudad.
Samtang, nakabaton man sang pasidungog kag cash incentives ang Bago City Juniors Softball League nga nagchampion sa bag-o lamang natapos nga National Finals Softball Tournament.
Nag 1st runner up naman ang Bago City Majors Softball League samtang ang Bago City Seniors Softball league ang nakakuha sang 2nd runner up sa tournament.
Ang Sangguniang Panglungsod sa syudad sang Bago ang nagpasar man sang resolution para sa cash incentive nga ihatag sa mga atleta nga naghatag dungog sa syudad kasubong man sa bug-os nga pungsod.
Sa mensahe ni Bago City Mayor Nicholas Yulo, ang grassroots sports development program sang syudad ang madamo na sang na produkto nga atleta nga nakahatag dungog sa syudad kag sa pungsod.
Suno kay Yulo, bugal sang Pilipinas nga makabaton sang gold medal ukon iban man nga sahi sang medalya sa international sports competition.
Suno kay Yulo isa sa pinakaimportante nga programa sang gobyerno ang sports program bangud ini ang nagadevelop sang skills sang mga kabataan indi lang sa sports bangud ini ang madala man nila sa ila pagpangabuhi.
Naghatag man ini sang tribute kay late Bago City Mayor Manuel “Tutay” Torres nga nagumpisa sang boxing program sa syudad sang Bago kun sa diin madamo na ini sang nabuligan.
