Subong nga Biyernes, ang Tropical Depression Kiyapo ang mas nagbaskog kag nag-intensify na sa Tropical Storm kaina alas-2:00 sang kaagahon.
Ang bagyo Kiyapo nga may international name nga “Noul” ang ulihi nasiplatan kaina alas-3:00 sang kaagahon sa 335 km nasidlangan sang Appari, Cagayan nga may kabaskugon sang hangin nga 65 km/h kag pagmadlos nga nagadangat sa 80 km/h.
Ini ang nagahulag sa 30 km/h West Northwestward nga direksyon.
Nakapaidalom na sa Tropical Cyclone wind signal no. 2 sa pila ka mga lugar partikular na sa Batanes, northern portion sang mainland Cagayan, Babuyan Islands, kag northern portion sang Ilocos Norte.
Samtang signal no. 2 naman sa nabilin nga bahin sang mainland Cagayan, Isabela, Nueva Vizcaya, Quirino, Apayao, Abra, Kalinga, Mountain Province, Ifugao, Benguet, nabilin nga bahin sang Ilocos Norte, Ilocos Sur, La Union, kag northern kag central portions sang Aurora.
Ang bagyo ang padayon nga magahulag sa west northwestward nga direksyon tubtob bwas nga adlaw, Sabado, Hulyo 25, padulong sa Luzon Strait.
Ang sentro sang Bagyo Kiyapo ang posible mag-agi malapit sa northeastern portion sang mainland Cagayan sa tunga-tunga sang aga kag hapon.
Ini ang may posibilidad naman nga magtupa sa may bahin sang Babuyan Islands sa hapon ukon gab-i.
Padayon ini nga magabaskog samtang naga-agi sa Extreme Northern Luzon kag mahimo mag-intensify pa gid sa severe tropical storm matapos mag-agi sa Babuyan Islands.
Lauman nga maggwa si Kiyapo sa Philippine Area of Responsibility (PAR) bwas sa aga.
Samtang padayon man nga nagaapekto ang Southwest Monsoon ukon hangin habagat sa Visayas, Southern Luzon, kag Mindanao.
Lauman ang mabulubagyuhon nga panahon sa Ilocos Norte, Batanes, Babuyan Islands, Cordillera Administrative Region, nabilin nga bahin sang Cagayan Valley, Ilocos Sur, La Union, kag Aurora tuga sang Tropical Cyclone Kiyapo.
Maeksperyensyahan naman ang tumalagsahon nga pag-ulan sa Occidental Mindoro, Palawan, Antique, Iloilo, Guimaras, kag Negros Occidental dala naman sang habagat.
Sa Metro Manila, CALABARZON, nabilin nga bahin sang Central Luzon kag MIMAROPA, kag Pangasinan, maeksperyensyahan naman ang lapta-lapta nga pag-ulan tuga sang bagyo Kiyapo.
Samtang, sa nabilin nga bahin sang Luzon, lauman man ang lapta-lapta nga pag-ulan dala sang habagat.
Lauman ang makanay tubtob mabaskog nga hangin kag kasarangan tubtob mabalod nga baybayon sa Mindanao.
