Nagdangat sa liog ang tubig-baha sa Phase 1, Country Homes Subdivision sa Barangay Estefania, Bacolod City matapos ang mabaskog nga ulan kahapon.
Sa interview sang Bombo Radyo Bacolod sa Homeowner nga si Alyas Malyn, sa 15 sini ka tuig sa lugar, kahapon ang pinakamalala sini nga na-eksperyensyahan nga baha.
Ini ang mas malala sa baha sang tinalikdan bangod nagdangat sa liog ang kadalumon kag mas malapad ang apektado nga ginbug-usan sang tatlo ka street kag apat ka blocks.
Suno diri, bangod mas mataas ang level sang ila balay, nagdangat sa dughan ang tubig-baha gani nagsalom man ang tanan nila nga appliances kalakip na ang refrigerator, TV, laptop kag cellphones.
Dugang pa sini nga gulpyada ang pagsaka sang tubig samtang madugay naman ang pagsubside.
Suno kay Malyn, nagkalaguba man ang ila mga personal nga dokumento, mga dokumento sa trabaho kag bisan ang gamit sang estudyante.
Ang ulan ang nagsugod kapin alas-3:00 sang hapon, naghulaw sang makadali, apang sa pagbalik ini ang nangin tayuyon na tubtob nga nagsaka ang baha.
Ginbakbak na lamang nila ang pader sang ila balay agud nga makagwa ang tubig.
May-ara sang submersible water pump nga ginhatag sa ila sang tinalikdan apang wala man mapuslan.
Ini bangod sa pagsaka sang tubig, nagsalom man ang mga electric circuits kag automatic nga nagtrip off ang kuryente gani wala naman nag-operate ang submersible water pump.
Interview with Alyas Malyn, Homeowner, Country Homes, Barangay Estefania, Bacolod City
May natrap pa nga tigulang nga may balatian sa ila kaingod, kag ginapasalamat na lamang nila nga naghulaw ang ulan bangod kun ini ang nagpadayun pa, yara ang posibilidad nga magdangat sa atop sang balay ang tubig.
May nagpadulong man sa ila nga personnel sang Bacolod City Disaster Risk Reduction and Management Office kaina sang kaagahon apang wala man sang dala nga solusyon, sa baylo gintsekyar lang ang ila sitwasyon.
Suno diri, nagsugod ang ila kalbaryo sang gintukod ang Rockwell kag gintabunan ang ginagawaan nila sang tubig.
Panawagan nila sa City Government kag kun ano man ang responsable nga mahatagan sang immediate solution ang ginatawag nila nga kalbaryo.
Suno diri, indi mapaktan ang tiyempo kag indi mapaktan ang sunod nga matabo sa ila kun tubtob sa estorya lamang ang ginahimo sang mga natungdan.
Dugang pa sini nga ang ila developer nga si outgoing Councilor Vladimir Gonzales ang wala gid nagapakita sa ila nga mga homeowners.
