Nagsubside na ang baha sa Marikina kag iban pa nga mga lugar sa Luzon tuga sang Typhoon Ulysses.
Sa interview sang Bombo Radyo Bacolod kay Capt. Ramil Palabrica sang Philippine Coast Guard Headquarters Support Group, ginpahayag sini nga nagapatigayon nalang sila sang clearing operations kaangay na lamang sa pagtinlo sang mga lutak nga nagkalabilin.
Takna alas-8:00 kaina sang aga sang nag-subside ang tubig-baha.
Nahibaluan nga nagpadulong sa area ang grupo dala ang mga rubber boats para sa rescue operations kun sa diin kalabanan sa ila mga narescue ang yara sa ibabaw sang ila mga atop bangud lapaw na sa tawo ang kataason sang tubig.
Madumduman nga nagdangat sa 21.5 ang water level sa Marikina River tuga sang Typhoon Ulysses.
Magluwas sa Marikina kag Rizal, may mga ginpangrescue man sila sa Batangas, Bicol, Navotas kag Cavite.
Suno kay Palabrica, mga alas-2:00 kaina sang kaagahon ang pinakaulihi nila nga ginrescue sa Marikina.
Una naman ini nga nagpang-abiso sa mga local government units (LGUs) nga magbakal sang mga rubber boats bilang preparasyon sa mga kaangay nga insidente.
Suno kay Palabrica, 37 ka mga rubber boats nga sarang maka-sakay sang walo tubtob napulo ka mga persona ang ila gindeploy kahapon para sa amo nga rescue operation.
