Ginpatigayon ang pagbakbak sa bahin sang bodega sang asin sa Barangay Banago, Bacolod City kahapon.
Sa interview sang Bombo Radyo Bacolod kay Bacolod City Mayor Greg Gasataya, sang Sabado sang aga ginpaserbe sini ang abatement order.
Suno kay Gasataya dapat ang manhole ang tubig ang nagaderecho sa baybay apang natabunan ang ginaagyan sang tubig bangud nagtukod sang pader ang bodega sang asin.
Suno diri, may yara man ginbutang ang kumpaniya sang alagyan sang tubig apang tuman man ka gamay nga indi man makasarang sa volume sang tubig.
Ini ang rason nga nag-issue ang ciudad sang abatement order agud nga masiguro nga makakas ang obstruction sa alagyan sang tubig.
Bangud wala man nagtambong ang tiglawas sang Artemis Salt Corporation sa ginpatawag sang ciudad nga meeting ginmanduan sang alcalde ang Bacolod City Engineers Office nga ipatuman ang pagkakas sang bahin sang pader nga nagapugong sa pagwa sang tubig direkta sa baybay.
Suno kay Gasataya sa karun nagaderecho na ilig ang tubig bangud wala na sang nagapugong.
Samtang ginpapangita man sang alcalde ang double barrel drainage bangud indi na ini makita kag kun makita magamando man ini nga i-restore agud nga madasig na nga magsubside ang tubig sa bahin sang Barangay Banago.
