Ginreklamo sang mga pumuluyo sang Brgy. Cansilayan, banwa sang Murcia ang maisog nga baho naggikan sa composting facility sang isa ka poultry farm.
Sa interview sang Bombo Radyo kay Punong Barangay Edgar Daguipin, indi lamang ang mga panimalay sa barangay ang naga-antos sang baho apang nalakip man diri ang Cansilayan National High School.
Suno diri, ginareklamo ang baho naggikan sa Ta-ala farms Incorporated, ilabi na kun ang dereksyon sang hangin ang padulong sa mga panimalay kag sa buluthuan.
Ini man ang ila na nga ginpadangat sa Department of Environment and Natural Resources (DENR) paagi sa Environmental Management Bureau (EMB) kag ginhatagan sang 45 days ang poultry farm para mag-comply sa mga rekomendasyon sa ila apang, nag-appeal naman sang extension ang Ta-ala.
Suno sa isa ka residente sang Barangay Cansilayan, inid gid maagwanta ang tuman ka baho gikan sa composting facility sang Ta-ala Farms Incorporated.
Suno kay Joel Lobaton Jr, nagasinakit ang tiyan sini sang tuman ka baho kag magluwas diri, may yara pa sang langaw nga naga-apekto sa ila.
