Pinakadako nga delegasyon sa World Championships of Performing Arts (WCOPA) ang Bailes de Luces sang banwa sang La Castellana nga nagpresentar sa Pilipinas sa competition sa Long Beach, California.
Sa interview sang Bombo Radyo Bacolod kay La Castellana Mayor Rhummyla Nicor Mangilimutan, 67 tanan ka mga pungsod ang magacompete sa WCOPA.
Ang Bailes de Luces ang magacompete sa contemporary dance, folk dance kag open category.
Sila man ang pinakadako nga delegasyon nga may 16 tanan ka dancers, samtang may isa man ka singer nga contender ang banwa.
Aminado si Mangilimutan nga dako ang ila nga naggasto dugang pa nga dako ang nangin halit sa banwa sang paglupok sang bulkan Kanlaon.
Apang, wala ini nakapugong sa team para magcompete sa luwas sang pungsod, bitbit indi lamang ang pangalan sang banwa sang La Castellana, apang ila man bitbit ang pangalan sang probinsya sang Negros Occidental kag mismo sang Pilipinas.
Ini man sa karun ang pinakadako nga stage kun sa diin magacompete ang Bailes de Luces.
