Duha ka adlaw antes ang pagsug-alaw sang tuig 2020, maiwat sa gihapon ang baklanay sang palupok sa firecrackers zone sa likod sang Pope John Paul II Tower sa reclamation area.
Sa interview sang Bombo Radyo kay Noel Latergo, bise-presidente sang asosasyon sang mga nagabaligya sang firecrackers sa nasambit nga lugar, nagakasubo ini bangud maiwat sa gihapon ang baklanay sang palupok apisar nagahilapit na ang bag-ong tuig.
Suno kay Latergo, diutay nalang ang nagasulod sa area agud magbakal kun kumparar sang nagligad nga tuig.
Aminado ini nga isa ka factor ang kapigaduhon ilabi na nga nagsaka ang presyo sang palupok apang nagalaom siya nga magdamo ang mga mabakal sa nabilin nga mga inadlaw bangud suno sa iya, daw halos wala sang buhin ang ila mga baligya.
Gindugang man sini nga bangud nagbagyo sang nagligad nga mga inadlaw, wala sang may nagasulod bangud malutak sa lugar.
Suno kay Latergo, 68 kabilog ang mga stall owners sa area apang mas madamo pa ang mga manugbaligya sangsa nagabakal.
Nagahingyo ini nga kuntani magdulhog man ang mga manugbakal sa ila agud nga makabenta man.
