Nagpigaw ang baklanay sang prutas suno sa fruit vendor sa Libertad Public Market.
Sa interview sang Bombo Radyo Bacolod kay Lerma Tanudra, ginalantaw sini nga ang paglala sang kapigaduhon ang nagapanguna nga rasun sa pag-iwat sang nagabakal sang prutas.
Ini bangod imbes nga ibakal sang prutas, ang kwarta sang mga ordinaryo nga mamumugon ang hustuhan na lamang ukon kulang pa para sa pang-adlaw adlaw nga pagkaon.
Dugang pa niya nga nagmahal man ang ila pamaligya, nga nakabase sa presyuhanay gikan sa source.
Ang mansanas nga sadto may-ara pa sang P10, ang sa karun P15 na ang pinakamanubo, may-ara man sang P25, kag tatlo sa P100.
3 for P100 man ang pamaligya sang Peras, samtang ang Orange ang mabakal sa presyo nga P20, P25, kag may-ara man sang P100 ang isa ka putos.
P150 naman ang kada kilo sang kabugaw nga gikan sa Davao, 60 per kilo ang Kapayas, P100 ang putos sang Strawberry Apple, P300 sa Grapes, kag P400 para sa Black Grapes.
Wala ginadula ni Tanudra ang posibilidad nga magasaka pa ang presyo sa paghilapit sa Paskwa.
Nagalaom sila nga makabawi, ilabi na nga karun halos hustuhan lang gid sa ila makaon ang ila benta sa pagbaligya.
Samtang ang mabakal lamang nga makabutong-butong sa ila amo ang lemon kag sunkist, nga may dako nga benepisyo sa ikaayong lawas, ilabi na sa nagaduging nga mga balatian.
Panawagan ni Tanudra sa mga pumuluyo nga magbakal sang prutas kun luyag nga magpabilin nga healthy.
