Aminado ang manugbaligya sang prutas sa Libertad Public Market sa syudad sang Bacolod nga nagdiutay ang mga nagabakal sang prutas bangud sa pandemia.
Sa interview sang Bombo Bacolod kay Carla Estrada, nagalaom sila nga magdamo pa ang mga nagabakal sang prutas samtang nagahilapit ang pagsaulog sang bag-ong tuig.
Ginpahayag man sini nga wala sang wholesaler sang prutas subong nga tuig bangud kalabanan ang fruit dealer.
Suno kay Estrada lain ang ila nga pamaligya subong nga tuig komparar sang tinalikdan.
Wala man nagbag-o sa presyo sang mga ginabaligya nga prutas.
Kaangay lamang sang Kiat-kiat nga mabakal sa P75 kada kilo kag Ponkan nga mabakal sa P5 to P10 kada isa.
Ginapatuman naman ang social distancing kag protocols batok sa COVID-19 sa mga nagabakal kag nagabaligya sang prutas.
Sa pihak nga bahin nangin matinlo naman ang meat section sang Libertad Market kag masanag na ini bangud sa ginbutang nga transparent atup kag wala na ini nagatulo sa tion mag-ulan.
