Aminado ang nagabaligya sang school bags sa Bacolod Downtown area nga tuman ka dyutay ang ila nga customer subong nga nagahilapit ang opening sang School Year 2025-2026.
Sa interview sang Bombo Radyo Bacolod kay Melody Lobe; saleslady sang School Bags sa mahina gid ang baklanay sa karun.
Nagalaom sila kuntani sang kaangay nga kita sa nakaligad nga abri klase, apang tubtob sa karun pipila lamang ang manugbakal.
Apisar sa dyutay nga manugbakal, sila ang nagahatag gihapon sang discounts.
Suno kay Lobe, ginalantaw man nila ang ikasarang sang manugbakal kun alang-alang ang budget.
Ang mga bags nga wala nagahabok ang ginabaligya sa balor P200 tubtob P240.
Ang nagahabok nga bags ang ginabaligya sa P300 tubtob P450.
Samtang ang trollies nga kun baklon sa mall nagabili sang P899 ang mabakal lamang sa P550 tubtob P700.
Suno diri, sadto antes ang opening sang klase sila ang makaginansya gid, apang sa karun mahina gid ang baligyaanay kag kun basihan ang mga tinalikdan nga tinuig, magapalay pagid ang baklanay sa bulan sang Agosto. Sa pihak nga bahin nagalaom ang manugbaligya sang school uniform sa downtown area nga magadamo ang manugbakal sa Sabado kag Domingo.
Sa interview sang Bombo Radyo Bacolod kay Florida Villarante, saleslady sang baligyaan uniform sa tabok sang Bacolod Central Market, medyo mahina ang ila nga baligya-anay subong nga tuig kun ipaanggid sang mga nakaligad.
Apang wala ini nagakadulaan sang paglaom nga madamo pa sang magahingagaw bakal sang uniporme sa Sabado kag Dominggo antes ang pagbukas sang klase sa Lunes.
Wala naman sang pagbag-o sa presyo sang uniporme.
Ang blouse ang nagarange sang P170 tubtob P180 para sa preschool, P270 sa Elementary samtang P300 naman ang sa High School.
pang may dugang naman nga bayad sa mga may lace kag iban pa nga design.
Sa palda, sa size nga 35 tubtob 45 inches ini ang nagarange sa P170 tubtob P180, ang 50 tubtob 55 inches ang nagabalor naman P220 samtang sa para sa High School ini ang nagabalor sang P250.
Ang mga checkered nga palda ang mabakal naman sa balor nga P300 pasaka.
Samtang sa pants, yara sa P200 tubtob P220 ang presyo para sa tela nga madasig magrun, apang kun luyag sang cotton, ini ang nagabalor P450 tubtob P500 para sa Elementary kag P500 tubtob P550 sa High School.
