May nagtupa nga bala sa sulod sang isa ka balay sa banwa sang La Castellana nga ginalantaw tuga sang stray bullet kadungan sa selebrasyon sang Bag-ong Tuig.
Sa interview sang Bombo Radyo Bacolod kay Police Major Romulo Gepilango, hepe sang La Castellana Municipal Police Station, ginapahayag sang tag-iya sang balay nga si Marie Christine Losenio, residente sa Gomez Street, Barangay Robles, La Castellana, nga nakita sini ang buslot sa atop sa bahin sang ila nga salas, samtang may tisping man ukon crack sa katupong sini nga tiles sa salog kapin alas-7:30 sang aga sang Enero 1.
Ini ang wala na ginpaligban sang tag-iya, tubtob nga nakakita sang deformed slug ukon bala pila ka metros gikan sa buka nga tiles alas-9:00 kaina sang aga.
Gilayon man sila nga nagreport sa kapulisan.
Ginalantaw sang tagbalay nga mahimo nagtupa ang bala kadungan sang paglupok man sang mga palupok, gani ini ang wala mabatian.
Suno kay Romulo, bangod late reported kag indi sa mismo tion sang pag-igo sang bala, ang insidente ang indi makabig nga stray bullet incident kundi recovered slug na lamang.
Ginpaidalom man nila sa ballistic examination ang narecover nga deformed slug para sa recording.
