Isa ka balaligyaan sang gadgets sa ciudad sang Kabankalan ang ginransak, alas-3:00 sang kaagahon sang Dominggo.
Sa interview sang Bombo Radyo kay PltCol. John Ganzon, Chief of Police sang Kabankalan City Police Station, nakita sang nakasaksi nga partially open ang establisyimento gani nagreport ini sa ila.
Sa pag-abot sang mga kapulisan, gin-contact nila ang tag-iya sang balaligyaan kag pasado alas-5:00 natigayon nila ini nga mabuksan.
Didto na nadiskubrehan nga may nadula nga mga cellphones.
Suno kay Ganzon, sa pag-review sang mga CCTV footages, duha ka mga lalaki ang nagsulod sa establisyimento.
Suno diri, masobra 30 ka mga gadgets ang nataban nga ginbanta nagabalor sang P800,000.
Sakay ang mga ini sang ila motorsiklo.
Sa karun, ginpahayag ni Ganzon nga gina-backtrack nila ang tanan nga CCTV footages nga posible gin-agyan sang mga suspetsado.
Pahanumdom naman sini sa mga tag-iya sang balaligyaan nga sigurohon nga naka-lock ang establisyimento kag dapat indi magbilin sang kwarta.
Importante man suno sa iya ang pag-install sang CTTV nga makabulig gid sa imbestigasyon inkaso may kaangay nga insidente.
