Gintupok sang kalayo ang isa ka balaligyaan sang mga kagamitan kaangay sang misitira, balayan sang manok kag iban pa nga himo sa goma sa Bangga Active, Circumferential Road, Barangay Mandalagan, Bacolod City, pasado alas 9:00 kagab-i.
Sa interview sang Bombo Radyo kay Jean, may ginapanag-iyahan nga tyange sa nasambit nga lugar, sang nagpauli na ini kahapon, may yara sang tatlo ka mga persona nga nagatambay sa balaligyaan kag ginlabutaw pa sila sang tatlo.
Makaligad ang isa ka oras, gintawgan ini sang iya upod nga may nagluntad nga sunog kag mabulig sila tawag sang bombero.
Suno sa iya, pag-abot nila sa lugar malapit alas 10:00 sang gab-i, nagaibwal na ang kalayo apang mahinay ang paglapta sini.
Suno diri, wala man naglapta ang kalayo sa tupad sini nga mga establisyimento.
Gilayon naman nga natapna ang sunog bangud sa madasig nga pagresponde sang mga bombero.
Sa karun, padayon pa nga gina-imbestigaran kun ano ang gintunaan sang sunog.
Samtang, ginpahayag sang caretaker kag nagaubra sa nasambit nga gomahan nga iya gid ginsiguro nga nasiraduhan kag naplastar sang maayo ang balaligyaan antes niya ini ginbayaan.
Sa interview sang Bombo Radyo kay Jolito Cuevas, 33 anyos kag lima ka tuig na nga nagabantay kag nagaistar sa balaligyaan, ginbayaan sini sang makadali ang gomahan bangud nagpadulong ini sa isa ka namatyan apang sang pagbalik sini, ginatupok na ini sang kalayo.
Suno kay Cuevas, nasunog gid ang tanan sini nga mga kagamitan kalakip na ang iya mga bayo kag electric fan, subong man ang mga goma nga ginagamit sa paghimo sang mga misitira.
Suno sa iya, wala ini nakahibalo kun ano ang ginsuguran sang sunog bangud wala man siya sang may nabilin nga kandila ukon nakasaksak nga mga appliances.
