Balatian sa kasapatan tuga sang mga pagbaha, ginabantayan sang Negros Occidental Provincial Veterinary Office

Hugot sa karon nga gina-monitor sang Negros Occidental Provincial Veterinary Office ang mga balatian nga posible nga mag-igo sa kasapatan kasunod sang pag-ulan kag pagbaha nga nagluntad sa Negros Occidental sang nagligad nga semana.

Suno kay Provincial Veterinarian Dr. Placida Lemana nga possible nga matapikan sang pneumonia ang mga sapat bangud nga exposed sila sa tugnaw.

Mahimo man nga magbatyag ang mga ini sang skin diseases kag infection bangud sang baha.

Ginpasiguro naman ni Dr. Lemana nga nagalibot ang ila mga personnel kag mga paravets sa kabaranggayan agud mabuligan ang mga nagasagod sang sapat paagi sa paghatag sang bulong kun may yara sang available nga supply ukon paghatag sang reseta.