Gin-anod sang baha ang balay sa Purok 2, Barangay Caliling, Cauayan, Negros Occidental.
Sa interview sang Bombo Radyo Bacolod kay Barangay Kagawad Erlinda Doremon, ang balay ang ginapanag-iyahan ni Roanne Macahilas.
Pahayag sang Kagawad nga nagsugod ang pagbubo sang makusog nga ulan alas-9:30 kagab-i samtang madasig naman nga nagsaka ang tubig-baha.
Naanod ang balay kapin alas-11:00 sang gab-i kun sa diin ginpabay-an nalang sang pamilya nga maanod ang balay upod sa mga gamit kaangay sang refrigerator, bangod ang importante nga safe ang duha ka kabataan sini nga Elementary pupils.
Suno diri, sa amo man nga area naanod sadto sa baha ang balay sang iloy sang biktima, apang sadto na stranded lamang sa tunga sang highway ang balay matapos masab-it sa kuryente.
Sa baylo, wala naman sang may nakahawid sa balay ni Macahilas gani ini ang nagtabok pa sa dalan.
Aminado ang Kagawad nga makakululbaan ang lugar kun magbaha, apang maayo man ang ila pagsinalayo kun wala sang ulan.
Ang pamilya ang nagabaligya sang mga sud-an sa higad sang highway.
Ang pamilya ang nagtinir sa karun sa Barangay Hall sang Brgy Caliling.
Sa record sang mga day care workers, 48 ka pamilya ang nag-evacuate ukon 133 ka indibidwal gikan sa Prk 2 kag Prk 1.
Suno diri, mismo sa balay sang Punong Barangay nagdangat sa tubtob sa sag-ang ang tubig-baha.
Pahayag ni Doremon nga tuman ka damol ang gal-om nga ila nakita sa nabukid nga area kag mahimo ang pag-ilig sang tubig panaog amo ang nagpalala sa pagbaha.
Suno diri, indi pa nila papulion ang mga evacuees tubtob nga wala pa nagkulpa ang baha.
