Nasunog ang isa ka buluthuan lakip na ang balay nga ginapanag-iyahan sang pamilya ni San Carlos City Mayor Renato Gustilo, kahapon kapin alas-4:00 sang hapon.
Sa interview sang Bombo Radyo kay Alren Gamao, manunudlo sa ciudad sang San Carlos, naglupok nga liquefied petroleum gas (LPG) ang ginhalinan sang sunog kun sa diin nalab-ot sini ang kuryente amo nga madasig ang paglapta sang kalayo.
Suno kay Gamao, naglapta ang sunog sa buluthuan nga Daisy ABC School.
Nangin madasig naman ang pagdako sang kalayo bangud human sa kahoy ang building samtang ang buluthuan naman ang human sa kahoy kag semento.
Antes pa man naglab-ot ang sunog sa isa ka hotel, ini ang natapna na sang katapo sang Bureau of Fire Protection gikan sa ciudad sang San Carlos City kag Escalante kag banwa sang Calatrava kag Toboso.
Nagdugay sang masobra sa isa ka oras ang sunog antes nadeklarar nga fire out.
Nag-eksperyensya naman sang pagkadula sang kuryente ang ciudad bangod sa sunog.
