Kalakip ang 22 ka unit sang computer unit sa mga natupok sang kalayo matapos ginsunog sang 30 anyos nga lalaki ang ila balay sa Purok Pahop, Barangay Handumanan, Bacolod City kapin alas-12:30 kaina sang udto.
Sa interview sang Bombo Radyo Bacolod kay Niel Ocaleña, wala ini makahibalo nga nagpauli ang ila subang nga utod nga si Marcil Foy Ocaleña, single, nga amo ang ginatudlo nga nagsunog sang balay.
Pahayag sini nga wala sila nagasapakanay sang magulang gani wala gid ini makahapit sa iya tiyangge sang magpauli.
Suno sa manghod, si Marcil ang nagapuyo sa ginarentahan nila nga balay sa Barangay Rizal, Silay City upod sa iloy.
Ini ang nagabulubisita na lamang sa ila balay humalin sang nastroke kag napatay ang ila amay sadtong tion sang pandemic.
Nakita man sini nga nagpost ang iya magulang sa facebook sang bayo nga iya ginasunog gamit ang butane, apang ini ang natabo sa Silay City pa lamang kag napost lima ka oras ang nakaligad antes natabo ang pagpanunog sang balay.
Suno sa manghod, sila sadto ang may computer shop apang nauntat sang pandemic, apang wala nila masaylo ang mga appliances bangod mabudlay gani ang mga ini ang nalakip sa nasunog.
Ginalantaw sini nga madamo sang ginapangatubang nga problema sa karun ang iya magulang.
Samtang ginpahayag naman sang residente nga malapit lamang sa balay nga nakibot ang mga ini sang hinali nga nagpuli si Marcil makaligad sang pila ka tuig.
Suno sa kaingod nga wala na nagpakilala, nga nasugata pa sang iya manghod si Marcil kag ini ang natingala nga wala nakasuksok sang tsinelas ang suspect.
Samtang sang ginlili sang isa ka residente ang balay, nakita nga may-ara na sang kalayo sa sala sang balay.
Nagbululigay naman ang mga residente sa pagpalong sang kalayo samtang wala man makalaton sa iban nga balay ang sunog bangod konkreto ang pader sang balay.
