Isa ka balay ang totally damaged samtang isa ang partially damaged sa nagluntad nga sunog sa Barangay Balabag, La Carlota City, Negros Occidental sang Disyembre 31 sang gab-i.
Sa interview sang Bombo Radyo kay Fire Senior Inspector Victor Loreto, acting city fire marshall sang BFP-La Carlota, alas 8:13 sang gab-i nagsugod ang kalayo samtang nagresponde ang BFP alas 8:18 sang gab-i.
Suno kay Loreto, nagsugod ang kalayo sa balay ni Lalaine Ramo samtang naulamid naman ang kaingod sini nga balay nga ginapanag-iyahan ni Alex Ramo.
Suno diri, posible nga may nabilin nga ginaluto ang pamilya sanday Lalaine kag sang ila ang naghalin sa balay, nalipatan nila ini nga patyon.
Ginalantaw sang BFP nga ang main source sang kalayo amu ang nag-init nga kan-on nga kalan.
Pag-abot sang mga bombero, nagakalayo pa ang balay kag nagdugay sang malapit isa ka oras ang pagpatay sang kalayo.
Nadeklarar naman nga fire-out ang BFP alas 8:52 sang gab-i.
Suno kay Loreto, totally burned gid ang balay ni Lalaine Ramo samtang partially damaged naman ang balay ni Alex Ramo.
Wala naman sang casualties ukon fatalities sa insidente.
Nagdangat sa 1st alarm ang status kag P90,000 ang estimated damage.
