Gin-anod sang tubig sa suba ang dako nga bahin sang hayob-hayob sini nga puluy-an sa idalom sang Lupit Bridge matapos nga hinali nagtaas ang tubig sa Lupit river sa Brgy Singcang-Airport, Bacolod City.
Makaluluoy ang sitwasyon sang walo ka pamilya nga nagapuyo sa idalom sang Lupit Bridge sa bahin nga malapit sa Abad Church sang sila ang ginbisitahan sang Bombo News Team kaina sang aga.
Antes paman, sila ang una na nga gintsekyar sang Bacolod City Disaster Risk Reduction and Management Office matapos gin-anod sang tubig ang dingding sang hayob-hayob kag ang papag nga tululugan na lamang ang nabilin.
Ini ang ginanag-iyahan ni Nanay Remenia, 68 anyos, nga duha ka tuig na sa lugar.
Sa interview sang Bombo Radyo Bacolod kay Nanay Remenia, walo sila ka pamilya ang nagapuyo sa idalom sang taytay, nga lunsay mga maghimata, kag sila ang masami nagatakas lamang sa ibabaw sang taytay kun magsaka ang tubig sa suba.
Apang sa pagtahaw sang tubig, sila ang nagabalik man sa idalom.
Ang taytay ang nagaserbe nila nga atop, samtang may-ara lamang sila sang ginbutang nga nagaserbe nga CR nga natabunan lang sang tela kag sako, kag may hagdanan lamang nga himo sa kahoy kag kawayan agud makasaka.
Suno kay Nanay Remenia, upod niya sa balay ang iya bata, apat ka apo, kag ang bana sini nga halos nabudlayan na maglakat.
Ang bata niya ang nagabyahe sang e-bike nga amo lamang ang nagabuhi sa ila, apang ini ang halos wala man sang kita bangod ginadakop ang mga nagabyahe sang e-bike.
Dugang pa nga P150 ang iya renta sa ebike kada adlaw, samtang ang maganar sini ang nagahamboy lamang sa P200.
Sila ang gikan pa sa Brgy 39 apang nademolish ang ila balay.
Suno kay Nanay Remenia, ginhatagan na sila sang relocation sa Abada Escay Relocation Site sa Brgy Vista Alegre sadto, apang malayo sa eskwelahan sang iya mga apo.
Panawagan ni Nanay Remenia nga sila ang mabuligan nga may makaon lamang sa adlaw-adlaw.
Matapos ginpadala kay Bacolod City Mayor Greg Gasataya ang mga litrato sang ila sitwasyon, sila ang gilayon man nga ginpadulungan sang alkalde kaina sang udto upod ang Department of Social Services and Development, City Health Office kag Bacolod Housing Authority.
