Kapin P1,200,000 ang balor sang halit sa isa ka balay nga gintupok sang kalayo sa San Mateo Village, Barangay Banago, Bacolod City, kaina sang aga.
Ang balay ang ginapanag-iyahan ni Janet Almajon kag sa interview sang Bombo Radyo sa nagarenta diri nga si Angelo Castandiello, nakibot ini sang ginpukaw siya sang iya iloy kag nabatian nga nagasinggitan nga maggwa na sa ila nga balay.
Nakita sini ang sunog kag gilayon man nga nagkuha sang tubig para ibasya apang madasig ang pagdako sang kalayo.
Suno diri, ang balay nga ila ginarentahan ang human sa concrete nga haligi apang ang atop sini ang human sa light materials.
Samtang suno naman sa iloy nga si Gennelyn Castandiello, madugay na nila nga ginareklamo sa Central Negros Electric Cooperative (CENECO) nga kun kaisa nagashort circuit kag nagakawad-an sila sang kuryente.
Apang sila ang ginsiguro sang CENECO nga wala ini sang problema.
Suno kay Gennelyn, samtang ginahimos sini ang mga kabataan para mag-eskwela, nakapanimaho ini sang sunog nga kuryente kag nakita nga may aso.
Nagpadulong ini sa likod sang ila balay kag didto nakita nga nagatulo ang kalayo gikan sa nagakasunog nga atop.
Gilayon man sini nga ginpagwa sa balay ang iya pamliya ilabi na nga madasig ang paglapta sang kalayo.
Nanawagan man ini sa CENECO nga ini tani mangin leksyon para sa kooperatiba nga kun may emerhensya ila ini gilayon nga itrabaho bangod nga indi na mabalik ang epekto sini nga halit.
