Ginpaulanan sang bala ang balay sang isa ka negosyante sa Purok Paho, Barangay Dulao, Bago City, kadungan sang pagbilin sang sulat nga nagapaandam nga ini ang mahimo indi na maglawig tubtob sa Desyembre.
Sa interview sang Bombo Radyo Bacolod kay Police Staff Sgt Armando Arao Jr., investigator on case sang Bago City Police Station, ang biktima ang ginkilala nga si Reymar Grande, 36 anyos.
Suno kay Arao, nakabatun sila sang tawag nagikan sa Punong Barangay sa Barangay Dulao nga may nagluntad nga pagpangluthang pasado alas-9:00 sang gab-i gani ila man gilayon nga ginpadulungan.
Suno diri, lima ka lupok sang armas luthang ang nabatian sang mga residente samtang nakumpirmar man nila ini matapos nga sila ang makarecover sang 9 ka fired cartridge cases kag anom ka live ammunitions, nga santo sa inisyal nga paglantaw sang imbestigador, iya sang 9mm pistol.
Nakitaan man sang pila ka igo sang bala ang sliding glass window sang nasambitan nga balay.
Magluwas sa mga basiyo sang bala, nakita man sa gwa ang isa ka papel kun sa diin nakaprint ang nawong kag pangalan ni Arao, nga may nakasulat nga paandam nga “UNTATI NA ANG PANG DISPALKO, ARIG-LUHA NA ANG TANAN NGA GINDISPALKO MO., KAY BASI INDI KANA KALAB-OT SA DESYEMBRE”.
Ginapakamaayo na lamang nga wala sang may nasamaran kanday Grande, kun sa diin sila ang yara sa ila nga kwarto upod ang iya asawa kag duha ka mga kabataan, nga magatulog na kuntani.
Sa imbestigasyon sang Bago City Police Station, wala man sila sang nakita nga record nga si Grande ang may kaangtanan sa iligal nga buluhaton.
Apang ginalantaw nila nga ang pagpamahog ang may kaangtanan sa negosyo sini nga dressed chicken.
Ang nasakupan sangb area of operation ni Grande amo ang banwa sang Valladolid, San Enrique kag Puntevendra.
Suno kay Arao, may-ara na sang gintumod nga person of interest si Grande, kag ini ang nakahanda man nga magpasaka sang kaso pananglitan may-ara sang makita nga ebidensya.
Paathag naman sang imbestigador nga wala sang CCTV footage sa lugar bangod ang ila balay ang napalibutan sang mga talamnan kag wala man sang panimalay nga nagagamit sang CCTV camera.
