Amat-amat na nga nagakay-o sang balay ang mga biktima sang sunog nga nagluntad sa Purok Kagaykay, Barangay 2, sang Miyerkules.
Sa interview sang Bombo Radyo kay Junjun Respiscio, isa sa mga nasunugan, apisar nga wala pa sang signal gikan sa brgy nga sila ang makapatukod na sang ila bag-o nga balay, apang sila na lang mismo nagdesisyon nga suguran na bangod nga magutok sa evacuation center.
Suno diri, mabudlay para sa ila nga pamilya nga magtinir pa sa evacuation center kag indi lamang siya ang nag-umpisa na nga magpatukod sang balay apang kasubong man nga nagtrabaho na ang iya mga kaingod.
Sa karun wala pa nakabalik ang kuryente sa lugar kag nag-tap lang ini anay sa iya nga kakilala para may magamit nga kuryente samtang nagatrabaho.
Ila pa man sa karun ginahulat ang pag-abot sang financial assistance gikan sa gobyerno.
Dako naman ang kapierdehan ni Respiscio matapos nga nasunog ang computer shop sini nga may 18 ka computer set.
Samtang, nagtaliwan na ang Purok President nga si Alejandro Tiad sang Purok King Fisher A, Barangay 16, Bacolod City nga nag-agom sang second degree burn sa nagluntad nga sunog sang Huwebes.
