Pila sa mga puluy-an sang mga kilala nga personalidad sa entertainment industry sa Estados Unidos ang gintupok sang kalayo sa nagluntad nga lapnagon nga wildfires sa California.
Isa sa mga nasunog sa Palisades fire amo ang anay Malibu mansion sang music mogul nga David Geffen.
Ang nasambit nga iconic nga balay ang ginbaligya sang 81 anyos nga music mogul nga anay ginapanag-iyahan ni Doris Day sang 2017 sa balor nga $85 million.
Ang balay sa karun ang gintupok na sang kalayo samtang may pila pa man ka dingding ang makita nga nagatindog pa apang ini ang nag-itum na bangud sa kalayo samtang ang iban nga bahin sang balay ang nasunog.
Indi pa maathag sa karun kun ano ka dako ang kahalitan apang ang maathag sa karun nga wala ini nakaluwas sa Palisades Fire.
Ang Palisades Fire ang nagsunog sang 15,000 acres kag nagtuga sang mass evacuation gikan sa luwas.
Ang mga celebrities nga sanday Miles Teller, Eugene Levy, Anthony Hopkins, Adam Brody and Leighton Meester, John Goodman, Billy Crystal, Anna Faris, Paris Hilton, Spencer Pratt and Heidi Montag, Mark Hamill, James Woods ang pila lamang sa mga nawad-an sang puluy-an bangud sa nagluntad nga wildfire.
Ang kalayo ang naglapta bangud sa mabaskog nga hangin sa kadasigon nga 99 miles kada oras kun sa diin gintupok sini ang Malibu, ang Pacific Palisades kag madamo pa.
Ang Palisades fire ang isa lamang sa madamo nga wildfire nga naghalit sa Southern California nga ginlakipan sang Eaton Fire nga nagsunog sang 10,000 acres, ang Hurst Fire nga nagsunog sang 700 acres, Lidia Fire nga nagsunog sang 80 acres kag Woodley Fire ang nagsunog sang 30 acres.
Ang balay sang music Mogul ang nahamtang sa Carbon Beach nga kilala man nga Billionaire’s Beach kun sa diin makita man ang balay sang mga celebrities nga sanday Janet Jackson, Courteney Cox kag Leonardo DiCaprio.
Samtang, ginbuksan naman ni Prince Harry kag Meghan Markle ang ila nga $29 million Montecito mansion para sa ila nga mga abyan kag palangga nila sa kabuhi nga napilitan nga mag-evacuate bangud sa nagapadayon nga wildfires sa southern California.
Gin-engganyo man sini ang publiko nga buligan ang mga nabiktima sang wildfire.
