Nainagurahan na ang gintukod nga Balay Silangan sa banwa sang Salvador Benedicto.
Suno kay P/Capt Eugene Tolentino, hepe sang Salvador Benedicto Municipal Police Station, ang gintukod nga Balay Silangan ang ika-41 na sa bilog nga Western Visayas, samtang ini naman ang ikatatlo sa probinsya sang Negros Occidental.
Nahibaluan nga kada local government units (LGUs) ang required nga may mapatukod nga Balay Silangan agud nga makonsiderar nga drug cleared.
Ang seremonya ang ginpangunahan naman nanday Philippine Drug Enforcement Agency (PDEA) Regional Director Alex Tablate, Negros Occidental Provincial Police Office (NOCPPO) Director P/Col. Romy Palgue, PDEA Provincial Director Nicholas Gomez; Salvador Benedicto Mayor Laurence Marxlen dela Cruz; mga katapo sang Salvador Benedicto Municipal Police Station, Department of Interior and Local Government (DILG), iban pa nga opisyales, kasubong man ang mga Sangguniang Bayan members sa banwa.
Ginpasalig naman sang hepe nga indi alarming ang kaso sa iligal nga droga sa Salvador Benedicto, apang apisar sina wala man sila sa gihapon nagapabaya.
Paathag ni Tolentino nga padayun ang pagbantay nila sa mga naga-engaged sa illegal drugs activities.
Ilabi na nga main road sang pagtransport sang iligal nga droga ang banwa gikan sa pila ka mga ports padulong sa syudad sang Bacolod kag pabalik.
Ginpakigbahin sang hepe nga sa pito ka mga barangay sa Salvador Benedicto, duha nalang diri ang indi pa drug cleared, samtang lima na ang na-drug clear.
Paathag sini nga sa pagtukod sang Balay Silangan, dako man ang mahatag sini nga tyansa nga mapabag-o ang mga drug surrenderees.
Ginapasalamatan man sini ang mga punong barangay sa aktibo nga pag-upod sa kampanya kun sa diin sa tion nga may mahibaluan nga engaged sa iligal nga droga, gilayon naman ini nga ginapabalo sa Salvador Benedicto Municipal Police Station.
