Gin-inagurahan na kahapon ang Balay Silangan sa banwa sang Hinobaan nga amo ang mayor nga requirement agud magdeklarar nga drug-cleared ang isa ka local government unit ukon ang mga barangay nga nasakupan sini.
Suno kay Police Major Clifford Batadhay, hepe sang Hinobaan Municipal Police Station, nag-upod ang mga local officials kag natungdan nga ahensya sang gobyerno sa launching sang Balay Silangan.
Ang Balay Silangan sang Hinobaan ang labing una nga pasilidad sa 5th kag 6th District sang probinsya kag ikaduha pa lang sa bilog nga probinsya.
Ini ang ginalakipan sang tatlo ka building nga ginabug-usan sang eskwelahan sang mga drug surrenderers, dormitoryo kag livelihood center kun sa diin sila pagatudluan sang mga palangabuhian.
Sa karon, anom na ka barangay sa Hinobaan ang nadeklarar nga drug-cleared kag tatlo ang nagaproseso apang nagrequire ang Philippine Drug Enforcement Agency sang Balay Silangan sa tanan nga LGUs bilang requirement.
Nagpanawagan naman si Batadhay sa mga residente nga engaged sa illegal drugs nga untatan na ang bisyo bangud indi pa ulihi ang tanan.
Suno diri, nakahanda ang LGU nga magbulig sa mga drug surrenderers agud nga makabalik sa normal nga pagpangabuhi.
