Nagdangat sa balor P1.7 million ang suspected shabu nga narecover sa drug buybust operation sa Barangay Singcang Airport, kun sa diin si Punong Barangay Atty. Caesar Distrito mismo ang nagserbe nga witness.
Ang subject ang maglive-in partner nga sanday Marivic Montes alias Madam, 54 anyos kag Ray-An Espinosa, 39 anyos, lunsay mga food vendor kag residente sang Purok Uno Sisi, sa nasambitan nga barangay.
Sa interview sang Bombo Radyo Bacolod kay Distrito, ang operasyon ang ginpatigayon sang Bacolod City Police Office – PNP Drug Enforcement Group (PDEG).
Suno diri, nadakpan na sadto ang maglive in sa pagbaligya sang illegal nga droga sa runway sang old airport, apang na-acquit sa kaso.
Una naman sini nga ginpaandaman ang duha nga mag-untat na sa illegal nga transaksyon apang wala nagapamati, kun sa diin ang ila nga puluy-an ang nagaserbe nga drug den.
Suno sa Punong Barangay, pangayaw kag tumandok sa banwa sang Valladolid ang duha nga nadakpan, kag nakuhaan sang tatlo ka knot tied kag onse ka sachet sang suspected shabu nga ginabanta nagabug-at 255 grams kag may standard drug price nga P1,734,000.
Pahayag ni Distrito nga nagpahamtang ini sang mga CCTV camera sa mga stategic area sa Barangay kag may-ara man sang masobra 200 ka Auxillary Team nga ginapalibot.
May ginpatukod man ini nga Tanod Outpost kag hugot nga ginapatuman ang 10pm to 4am nga curfew for minors.
Suno diri, ginsugo sini ang mga auxillary team nga panilagan ang mga pangayaw nga nagasulod-gwa sa Barangay.
Bangod sini, nakita man ni Distrito ang pagnubo sang illegal nga transaksyon sa Barangay Singcang-Airport.
Nagalaom ang Punong Barangay nga mauntat na ang pagtiyog sang illegal nga droga, bangod aminado ini nga kalabanan sang mga nagaduso amo man ang mga nagahimo sang pagpangawat agud nga makasustiner sa ila nga bisyo.
Panawagan sini sa mga dorogista nga mag-untat na antes pa maghinulsol sa tion nga sila ang madakpan sang otoridad.
