Narekober sa anti-smuggling operation ang kapin P14.6 million nga balor sang ginapatihan illicit cigarettes sa Purok Narra, Barangay Malingin, ciudad sang Bago, kahapon sang hapon, Agosto 6.
Arestado ang isa ka lalaki nga ginkilala nga si Alyas Kev, 32-anyos, residente sang Talon Talon, Brgy. Poblacion, Zamboanga City.
Ang operasyon ang ginpatigayon sang Bago City Police Station kaupod ang RID, PRO NIR, PIU, NOCPPO, kag CIDG Negros Occidental PFU kasubong man sang pila ka mga barangay officials, matapos mabalabagan sa checkpoint sa Barangay Lag-asan ang isa ka puti nga Isuzu aluminum van nga may karga nga ginasuspetsahan kontrabando nga sigarilyo nga gintago sa idalum sang mga labada.
Gintudlo sang driver ang ginhalinan sang kargamento sa isa ka compound sa Barangay Malingin.
Sa pagresponde sang mga otoridad sa nasambit nga compound, may duha ka wala pa makilal-an nga lalaki ang gilayon nalagyo sang nagahilapit na ang mga otoridad sa area.
Sa pag-inspect sa sulod sang compound, natukiban ang 255 ka mga box sang suspected illicit cigarettes, isa ka puti nga van, kag isa ka puti nga Mitsubishi Lancer.
Yara na sa kustodiya sang Bago City Police Station ang tanan nga nakumpiskar nga ebidensya para sa nagakaigo nga dokumentasyon.
