Nagdangat sa kapin P20 million ang balor sang smuggled nga sigarilyo ang nakuha sa isa sa apat ka abandonado nga panel van nga nakita sa Purok-6, Barangay Nagbo-alao, Basay, Negros Oriental pasado alas-12:00 sang Sabado sang udto.
Sa interview sang Bombo Radyo Bacolod kay Police Lt. Edwin Santos, Chief Special Operation Team sang Negros Island Region Highway Patrol Group, apat ka mga salakyan ang naabtan sang mga ini apang sang gintsekyar sang katapo sang Bureau of Internal Revenue (BIR), isa lang ang may unod sang smuggled cigarettes.
Suno kay Santos madugay naman ang Highway Patrol Group ang nagamonitor sa mga salakyan nga may karga nga smuggled nga sigarilyo.
Ginabanta nga nagdangat sa P20 million ang balor sang mga narecover nga smuggled cigarettes.
Ginahulat man sang mga kapulisan ang mga suspek nga magwa sa lugar apang mahimo nga natiktik-an sang mga ini ang operasyon sang mga otoridad gani gin-abandonar sang mga ini ang panel van.
OR/CR lamang sang salakyan ang nakuha sang mga ini, nga gindala sang BIR apang wala sang iban nga dokumento sang salakyan.
Ang salakyan nga may smuggled cigarettes ang nagikan sa Mindanao, apang ang tag-iya sang salakyan ang residente sang Cebu.
Sa karun ginapangita pa sang mga otoridad kung sin-o ang tag-iya sang panel van nga ginkargahan sang nasambit nga mga sigarilyo agud maimbetahan, nga mahimo mangatubang sang kaso.
